Поздравительная речь Митрополита Макария нововенчанному царю Иоанну IV
Поздравительная речь Митрополита Макария нововенчанному царю Иоанну IV
1547, января 16
О Святем Дусе господин и возлюбленный сын святыя Церкве инашего смирения, князь Великий Иван Васильевич, всеа Русии самодержець! Се отныне от Бога поставлен еси князь Великий и боговенчанный царь правити хоругви и съдержати скипетр царства Русскаго, и венчан еси царьским венцем по благодати Святаго Духа, и по милости Пресвятыя Богородица, и по благословению великаго чюдотворца Петра Митрополита всеа Русии и всех святых молитвами, и по благословению приснопоминаемаго святаго отца твоего великаго князя Василья Ивановича, всеа Русии самодержца, и по данной нам благодати от Святаго и Животворящаго Духа, рукоположением нашего смирения, с архиепискупы и епискупы Русския Митрополия и со всеми священными Соборы в святей соборной Церкви Успения Пресвятыя Богородица у чюдотворных гробов великих чюдотворцов Петра и Олексея, Ионы Митрополитов всеа Русии и прочих святых Митрополит Русския Митрополия, в царствующем твоем граде Москве.
И ты, господине сыну, боговенчанный преславный царь князь Великий Иван Васильевич, всеа Русии самодержец, имей страх Божий в сердцы, и храни веру христианскую Греческаго закона чисту и непоколебиму, соблюди царство свое чисто и непорочно, якоже ныне приял еси от Бога, и люби правду и милость и суд правый и к послушанным милостивное. К святей же соборной Церкви и к всем святым церквам имей веру, страх Божий, и воздавай честь, понеже в ней, царю, второе порожен еси от святыя купели духовным святым порожением, и святым честным монастырем великую веру держи, по данной ти от Бога царской власти. К нашему же смирению, ко своим богомолцом о Святем Дусе царское свое духовное виновение, по Христову Евангельскому словеси, к святым Своим учеником и Апостолом глаголющь: «Слушая вас Меня слушает, а отметался вас Меня отметается, отметайся Меня отметается пославшаго Меня» (Лк. 10,16), и сего ради видяще и се, елико кто честь воздаст святителю, и та честь Самому Христу восходит, от Него же и мзъды приимут сторицею. Братью же своею по плоти, о благочестивый и боголюбивый царю, люби и почитай по царьскому своему духовному союзу и по божественному Апостолу: «Любяй бо, — рече, — брата своего в Бозе пребывает и Бог в нем» (1 Ин. 2,10). Бояр же своих и вельмож жалуй и бреги по их отечеству, и ко всем же князем и княжатам, и детем боярским, и к всему христолюбивому воинству буди приступен и милостив и приветен, по царьскому своему сану и чину. Всех же православных крестиян блюди и жалуй и попечение имей о них ото всего сердца. За обидящих же стой царьски и мужески, и не попускай и не давай обидети не по суду и не по правде. Се бо, о царю, приял еси от Бога скипетр правити хоругви великого царства Русскаго и разсудити и управити люди твоя в правду, блюди и храни бодрено от дивиих волк губящих е, да не растлят Христова (Ин. 10, 12) стада словесных овец, от Бога вданнаго ти, врученнаго съдержати скипетр, по воли Его святой и по вашему исконному царскому жребию и отечеству, того великаго Русскаго царства.
И [п]аки глаголю ти, боголюбивый царю: блюди с Богом и храни елика твоя царьская власть и сила съдержит, покрываем Вышняго десницею и храним благодатию Святаго Духа, от всех врагов твоих видимых и невидимых, глаголет бо Господь Бог пророком: «Аз воздвигох тя с правдою царя, и приях тя за руку, и укрепих тя», «сего рада слышите, царие, князи разумейте, яко от Бога дана бысть держава вам и сила от Вышняго» (Прем. 6, 1-3). Вас бо Господь Бог в Себе место избра на земли, и на свой престол вознес посади, милость и живот положи у вас. Вам же подобает, приемше от Вышняго повеление, правление человеческаго рода, православных царей, не токмо о своих пещися и свое точию житие правити, но и вся обладаемое от треволнения спасати и соблюдати стадо его от волков невредимо и боятися серпа небесънаго, и не давати воля злотворящим, якоже бо солнъцу на земли не сущю, темно суть все и неразсудно, сице и наказания души не суща, размешено все, едино бо точию добродетель о стяжании безсмертно суть.
И паки ти глаголю, о боговенчанный царю: цело имей мудрование православным догматом, почитай излише Матерь твою Церковь, о Святем Дусе тоя въздои, и сам почтен будеши от нея. И священник стыдися, яко овца духовная ходатая к Богу, честь бо священническая на Бога восходит, тако, еже на них безчестия множая паче Бога прошевает. Языка же льстива и слуха суетна не приемли, царю, ниже оболгателя послушай, ни злым человеком веры не емли. Смотряй в себе, о боговенчанный царю, яко всем человеком мудрость честнейши есть и всем тьщателнейши, все бо ту яко благо похваляют, и любомудру быти подобает, или мудрым последовати, на них же воистинну яко на престоле Бог почивает; не тако красная мира вся. Якоже добродетель красит царя, но зри доброту духовную и раздавай саны туне, а не на дарех продавай власти, еже бо ценою купивый власть множая паче обладаемыя купует, яко мздодаянию надеяся, ко мздоприятию без боязни зрит.
Аще бо и неприступен еси, царю, нижняго ради царства, но удобь приступен буди горняя ради власти. Но имаши и сам Царя, иже на Небесех, аще убо всеми печетца, яко бо сице потребно есть, царю, и тобе ничто же есть презирати. Тщяся, о боговенчанный царю, не точию сия царства исправити нравы благими, но Небесная наследовати добродетелными благодеянми. И аще хощеши милостива имети себе Бога и Царя Небеснаго, милостив буди и ты, царю, ко всем, да и зде добре и богоугодне поживеши и царствующи в веки веком добрым царьским слухом зде, а тамо славою с ангелы Божиими, преж втораго воскресениа и Страшнаго суда. Силою Творца, и премудростию Искупителя и Духа Святаго Утешителя благодатию възмогай, о благочестивый царю, о Христе паки Им возмогай, да наследник будеши и Небеснаго царствия со всеми святыми православными царии, да возможеши с дерзновением рещи и во второе пришествие Господа Бога и Спаса нашего Исус Христа: «Се аз, Господи, и людие Твои, их же ми еси дал» (Евр. 2, 13) великаго Твоего царства Рускаго». И тогда, о благочестивый и боговенчанный царю, и сам усльшиши сладкий он глас Небеснаго Царя и Бога: «Благий Мой рабе, добрый и верный русский царю Иване! О мале Ми бысть верен, надо многими Тя поставлю, вниди в радость Господа своего» (1 Кор. 2, 9). И тогда, царю, внидеши во Царство Небесное со всеми святыми, и приимеши неувядаемый славы венца, по Божественному Апостолу, «иже око не виде и ухо не слыша и на сердце человеку не взыде, яже уготова Бог любящим Его» (1 Кор. 2, 9). И тогда, боговенчанный царю, против своих царских подвигов и трудов приимеши от Бога мзду сторицею, и начнеши со Христом царствовати и в Небеснем царствии, и со ангелы и со всеми святыми славити Бога, в Троици поклоняема и вселитися с Ним в бесконечныя векы. Буди же с тобою, боговенчанным и православным царем, и нам получити Царство Небесное, благодатию и человеколюбием Господа нашего Иисуса Христа, с Ним же Отцу, купно и Святому Духу, честь и поклонение, ныне и присно и во векы веком, аминь.
И потом Митрополит благословляет царя крестом, и паки глаголет к нему: «О боговенчанный царю, князь Великий Иван Васильевич, всеа Русии самодержець! Буди на тобе милость Божия и Пречистыя Богородица, и сила святаго и животворящаго Креста, и великих чюдотворцов и всех святых молитва и благословение, да и нашего смирениа молитва, и благословения всего священнаго Собора Русския Митрополия, отныне и до века, и во многия роды и лета, и на твоей Богом дарованной Великой княгини и царицы, и ваших богодарованных чадех. И умножит Господь Бог живота царства вашего, «и узриши сыны сынов своих» (Пс. 127, 7) и устроит Господь царство твое, и возвысит Господь царьскую десницу твою надо всеми твоими недругы и устроит Господь Бог царство твое в род и род на векы, и вси людие рекут: буди и будет многолетно». [1]
ПРИМЕЧАНИЯ
[1] Барсов Е.В. Древнерусские памятники священного венчания царей на царство в связи с греческими их оригиналами с историческим очерком чинов царского венчания в связи с развитием идеи царя на Руси // Чтения в Императорском Обществе Истории и Древностей Российских при Московском Университете. М., 1883. Январь-март. Кн. 1. С. 80-85.
Источник: Архимандрит Макарий (Веретенников). Святой Митрополит Макарий. Приложение № 8 к «Киприановскому источнику». М., Троицкое-Голенищево, 2015. C.93-97.
