Сказание о явлении Митрополита Макария и прп. Александра Свирскаго игумену Иродиону

Сказание о явлении Митрополита Макария

и прп. Александра Свирскаго игумену Иродиону

Сказание о явлении преподобнаго отца нашего Александра Свирскаго чюдотворца и иже с ним во святых отца нашего Макария Митрополита Московскаго и всеа Росии, како приидоша церковь свящати святаго Николы.

[Л.322 об.] Хощу вам, братия, сказати от многих чюдес малая, нечто бывшаго чюдеси во обители преподобнаго отца нашего Александра игумена Свирскаго чюдотворца, сотворшееся во освящении церкви на вратех святаго Николы чюдотворца, имать же сице. Иногда же убо во един от дний вечеру глубоку сущу и тме належащу велице, яко и в полунощи бяше, смиренному мне, Иродиону игумену Живоначальныя Троицы, стоящу ми на молитве и молящуся ко Всемогущему Богу и Пречистой Его Матери во убозей моей молитве. И воздремавшу ми, и возлег на одре моем, и уснух, и абие внезапу видех во оконце келия моея свет велий сияющь с монастыря в келию. И аз же убо возрех и преклонился, видети хотя, что хощет быти, и видех, яко лучю некую божественну сияющу по всему монастырю. И восхотех же аз уведети бывшее ми, что се есть. И видех внезапу от церкве Святыя Богоматере к востоку идущу по монастырю вкруг [Л.323] церкви Живоначальныя Троицы преподобнаго си отца Александра, и в руце своей носяща честный и животворящий крест, и пред ним отроки идуща, во одежду белу оболчены, и в руках их свещи горяща. И слышах преподобнаго си отца глаголюща тихим гласом: «О, Макарие, гряди после мене и покажу ти место на вратех монастыря и на нем же хощу поставити церковь во имя святаго Николы Мирскаго чюдотворца». И аз же скоро возрех, и глаголу тому прилежах, и видех два мужа лепа зело во след святаго идуща, и по себе ведуща конь в сани впряжен, а в них седяща преосвященнаго Макария Митрополита и в руках своих держаща образ святаго Николы. И око ему десное затворено бяше, но токмо едино ему око левое зряще беяше. Аз же убо, смиренный Родион, вся сия бывшая ми видех, и ужаса исполнен бых, и скоро изыдох из келии моея и притекох к Митрополиту и припаде пред ним и поклонихся и рех убо к нему: [Л.323 об.] «О, святый владыко, како ти ся затворило десное твое око?» И оному же отвещавшу: «Грех ради моих, чадо, сия мне сотвори Бог». Потом же паки слышах преподобнаго Александра, к себе Митрополита гласяща. И оному же скоро после святаго женущу [1] и преподобному же отцу Александру въкруг церкве Живоначальныя Троица идуща, тако же и Митрополиту по нем грядущу. И пришедшу убо святому ко дверем церковным и знаменавшу честным крестом Митрополита Макария, его же в руце своей святый ношаше. И тако оба внидоста во церковь и затворишася има двери церковныя и к тому невидими быша. И аз же убо, вся сия страшная и неизреченная видев, и ужасохся вельми о бывшем чюдеси святых отец и воздрогнув же от сна, убудихся и бых во страсе велице от чюднаго сего видения. И тако прославих о сем Всемогущаго Бога и святых отець Александра и Макария и пребых всю нощь без сна до утрени, моля Бога [2].

ПРИМЕЧАНИЯ

[1] Жену — преследую, гонюсь (Дьяченко Г., свящ. Полный церковно-славянский словарь. М., 1993. С. 181); женущу — спешащу.

[2] РГБ. Ф. 256. Собр. Н.П.Румянцева. № 364 Житийный сборник.

Источник: Архимандрит Макарий (Веретенников). Святой Митрополит Макарий. Приложение № 8 к «Киприановскому источнику». М., Троицкое-Голенищево, 2015. C.110-111.